ទឹកភ្នែកស្រីមេម៉ាយ

ភ្លៀងអើយ ម្តេចធ្លាក់សន្ទាប់ស្ទើររហែកមេឃដូច្នេះ!

«ទឹកភ្នែកស្រីមេម៉ាយ»

I-សម្លឹងមើលមេឃមេឃស្ទើររហែក ឱតំនក់ទឹកភ្នែកស្រក់ចែកផែនដី
ផ្គរលាន់គ្រហឹមអូនយំនឹកប្តី ស្រណោះកាលថ្ងៃប្រុសថ្លៃចេញទៅ។

II-ទឺកផ្តើមជំនន់ជន់លេចភ្លឺស្រែ គ្រាន់ជាភ្លៀងកក់ខែម្តេចធំពេកកូវ
ទឹកភ្នែកអូនហូរព្រោះរឿងអាស្រូវ ដែលចារទុកនៅដៅពេញផែនផ្ពាល់។

R-ជាស្រីមេម៉ាយកាយដែលកំព្រា រស់តែឯងរងារដូចជាសំណល់
ខ្វះការទុកដាក់រស់សែនកង្វល់ តើអ្នកណាយល់សូមជួយប្រាប់ស្រី។

III-បងលាទៅឆ្ងាយគ្មានថ្ងៃត្រឡប់ ដូចផ្គរលាន់សន្ធាប់ឲ្យញ័រហរទ័យ
ឃ្លាតមួយជីវិតគ្មានពាក្យវិលវៃ ឱប្រុសថ្លៃ.. សច្ចាផ្សងជួបគ្រប់ៗជាតិអើយ។

កំព្រាស្នេហា

វេលាមួយ ស្ថិតក្រោមសំពាធនៃសេចក្តីស្នេហា សូមវេលាអ្នកកុំដើរយឺតពេក អាណិតដល់ចិត្តខ្ញុំដែលកំពុងរងារ អន្ទះសារចង់ជួបម្ចាស់ដួងចិត្ត តើអ្នកអាចដើរលឿនជាងនេះបានទេ?

ទុកជាអនុស្សាវរីយ៍រាត្រីពិសាឃបូជា រាត្រីដែលព្រះច័ន្ទនៅជិតផែនដីបំផុតក្នុងឆ្នាំ២០១២នេះ។

«កំព្រាស្នេហា»

ខែយប់នេះភ្លឺច្បាស់រស្មីត្រចង់ រះពេញវង់ឲ្យខ្ញុំភ្នកនឹកស្នេហា
សែនក្រអូបក្តិនផ្កាចំប៉ីចំប៉ា ជាអនុស្សាដែលបងដាំទុកឲ្យស្រី។

ខ្យល់ជំនោរថ្ងួចថ្នូរហាក់ដឹងចិត្តបង ឃ្លាតនួនល្អងឲ្យបងកំព្រាហរទ័យ
ដូចរសាត់អណ្តែតកណ្តាលជលសៃ មមៃរកស្រីក្រសោបឱបថែស្នេហា។

ដួងខែអើយអ្នករះបំភ្លឺចិត្តខ្ញុំ តែបែរនាំឲ្យខ្ញុំកើតទុក្ខសោកា
ព្រោះរស់ក្រោមសំពាធនៃក្តីស្នេហា ស្នេហាស្នេហាតែបែរជាត្រូវឃ្លាតគ្នា។

ឱព្រះពាយសូមអ្នកជួយនាំដួងចិត្ត សូមអាណិតដល់ចិត្តដែលរស់រងារ
រស់គ្មានអូនដូចក្បួនឃ្លាតចាកគង្គារ រងារកំព្រាវេលាមិនត្រាប្រណី។

(គ្មានទំនុកភ្លេង)

ស្នេហ៍អូនដូចរសកាហ្វេ

ស្នេហានិងកាហ្វេ មានលក្ខណៈប្រហាក់ប្រហែលគ្នាខ្លះ ដែលគួរអោយចាប់អារម្មណ៍ លោកអ្នកធ្លាប់ជ្រាបទេ?

ស្នេហ៍អូនដូចរសកាហ្វេ

I-ស្នេហានៃខ្ញុំដូចរសកាហ្វេ ល្វីងខ្លាំងម្ល៉េះទេនៅតែចង់សាក
ព្រឹកអត់មិនបានល្ងាចក៏ពិបាក បើសិនចង់ផ្អាកពិបាកញ័រទ្រូង។

II-ដូចក្តីស្នេហាខ្វះការទុកដាក់ ខ្វះការជឿជាក់ថ្នាក់ថ្នមបេះដូង
រសាប់រសល់ខ្វល់ពេញដើមទ្រូង ទោះយំច្រើនដងក៏នៅតែស្នេហ៍។

R-ជួបបងដំបូងបេះដូងឌុកដាក់ លោតញាប់ញ័រញាក់ពិបាកម្ល៉េះទេ
ទោះបីប្រឹងទប់ក៏មិនឈប់ដែរ ដូចញុំាកាហ្វេដំបូងដែរណា។

III-បើបងបានឮកុំនៅឈរធ្មឹង កុំនៅឈរធ្មឹងឲ្យស្រីសោកា
បន្ថែមជាតិផ្អែមឲ្យក្តីស្នេហា ថ្នាក់ថ្នមលោមចិន្តាអូនផងណាបង។

គូលែនគិរី

ទុកជាអនុស្សាវរីយ៍ដំណើរទៅលេងភ្នំគូលែនថ្ងៃនេះ (២០ មេសា ២០១២)។

I-គូលែនគិរីជាទីមនោរម្យ ទីឋានសាកសម្យនឹងដើរកម្សាន្ត
ព្រះធំគង់ខ្ពស់សុំផ្សងកុំខាន សូមសុខក្សេមក្សាន្តនិងបានមង្គល។

II-វាលស្តេចគំលង់និងលិង្គមួយពាន់ មើលបានកុំជាន់នាំសឹកករិចរិល
ក្បង់ទឺកលុបមុខនាំសុខកុំខ្ជិល រួចវិលទៅលេងទឺកជ្រោះពិសិដ្ឋ។

R-គូលែនជ្រោះធំនាំមុំទៅលេង ទឹកត្រជាក់ស្រេងដូចបានដឹងចិត្ត
ថាបងនិងអូនមានស្នេហ៍ស្មោះពិត ចិត្តផ្តិតនឹងចិត្តឥតគិតនឹងប្រែ។

II- សូមអង្គបារមីទឹកដីគីរី ទុក្ខកុំញាំញីរំខានក្តីស្នេហ៍
ប្រោះព្រំមង្គលដល់គូបុព្វេ សច្ចាឥតប្រែយកអូនជាគូ។

បុប្ផាចុងឃ្នាស

ទុកជាអនុស្សាវរីយ៍ដំណើរទៅលេងបឹងទន្លេសាបថ្ងៃនេះ (១៨ មេសា ២០១២)។

I-សូរិយាទន់ទាបរៀបលិចឯនាយ ឃើញពីចម្ងាយគួរស្តាយវេលា
នឹករូបសម្ភស្សស្រស់លើសពណ៌នា ឆក់គួចចិន្តាកំឡោះភ្នំពេញ។

II-ភូមិបណ្តែតទឹកគួរនឹកអាល័យ ចុងឃ្នាសនៅឆ្ងាយតែចិត្តទន្ទេញ
ចង់បានវេលាដូចល្ងាចម្សិលមិញ បងនិងសម្លាញ់ឃើញខ្នាញ់ដក់ចិត្ត។

R-អូនជាបុប្ផារីកកណ្តាលបឹង ឆាបដួងព្រលឹងឲ្យបងរែងគិត
បងជាទេសចរលួចផ្សងចងចិត្ត មិនឲ្យមាសស្និទ្ធរបូតបានឡើយ។

III-បឹងទន្លេសាបខាបចិត្តខ្ញុំទៅ យកផ្ញើរទុកនៅនឹងពៅត្រាណត្រើយ
បើពិតនិស្ស័យចារជាគូរកើយ សូមឆ្លើយមួយម៉ាត់ឲ្យបាត់សង្ស័យ។

ដែនកោះជម្រកស្នេហ៍

I-ស្រណោះក្លិនអូននៅក្បែរទ្រូងបង អាសូរកន្លងគេឆក់ពីដៃ
រឿងអូននិងបងហាក់ដូចថ្មីៗ ឥឡូវពិសីត្រូវគេត្រកង។

II-អាសូររឿងចាស់ផ្លាស់ផុតយូរឆ្នាំ តែចិត្តនៅចាំកាលអូនផ្តាំបង
ឧស្សាហ៍ទៅលេងផ្ទះស្រីនួនល្អង តែកម្មកាចចងព្រោះបារាំងអប្រិយ។

R-ស្រណោះស្រណោកបងយំបោកប្រាណ ព្រោះឃ្លាតកល្យាណគ្មានថ្ងៃវិលវៃ
អូនបានទៅគេហុកសិបឆ្នាំប្លាយ នឹកឡើងសែនស្តាយកាយដែលឃ្លាតឃ្លា។

III-អាសូរដែនកោះដែនជម្រកស្នេហ៍ ព្រោះកម្មបុព្វេឲ្យយើងព្រាត់គ្នា
ព្រាត់ទាំងស្រឡាញ់មិនបានពោលលា មិនមែនមួយគ្រាគឺព្រាត់មួយជីវិត។

អូនត្រាប់កាកី

I-កាកីជាឈ្មោះស្រីលុះតណ្ហា វិលវល់អត្មាស្នេហាពីរបី
មិនគិតប្រមាណប្រាណខ្លួនជាស្រី មិនស្មោះនឹងប្តីព្រោះព្រានតណ្ហា។

II-ផ្ការោយព្រោះឃ្មុំក្រេបអស់លំអង ស្រីក្បត់រូបបងស្រវាដុល្លា
មិនគិតប្រមាណស្នេហ៍បានឆីស្លា ញាតិមិត្តមីងមាដែលធ្លាប់សង្ឃឹម។

R-កង្រីមិនត្រាប់បែររាប់កាកី ជ្រើសស្នេហ៍កាឡៃក្បត់ប្តីបានផ្ទឹម
បោះបង់ស្នហាដែលធ្លាប់ញញឺម ពេលនេះសង្ឃឹមប្រែជាទឹកភ្នែក។

III-បងឈរឱបកូនអូនឈរឱបប្រុស ឥតស្តាយស្រណោះស្នេហ៍ដែលបាក់បែក
បងសូមឆ្លាក់ឈ្មោះថាស្រីពស់វែក អូនកុំអល់អែកទូលរែកយកចុះ។