ទាក់ទើចិត្ត

ប្រមាណជិតមួយឆ្នាំហើយ ឬជាងមួយឆ្នាំ ដែលខ្ញុំពុំបានសរសេរអត្ថបទថ្មី និងសកម្មនៅក្នុងភូមិ Word Press នេះ។ នឹកអ្នក​ទាំងអស់​គ្នា​ជាអនែក ​នឹក​ការពិភាក្សា​ពីនេះពីនោះ​។ ខ្ញុំគិតថា​នឹង​ចង់សរសេរអត្ថបទនៅ​ទីនេះ​បន្តទៀត ប៉ុន្តែ​មាន​មូលហេតុ​ជាច្រើន​នាំ​ឲ្យស្ទាក់ស្ទើរ​ក្នុងចិត្ត តែខ្ញុំគ្មាន​បំណង​នឹង​បោះបង់​ប្លុក​នេះចោលសោះឡើយ ព្រោះ​យ៉ាង​ហោចណាស់ក្នុងមួយថ្ងៃមិនតិច​ជាង​៣០ដង ឡើយ​ដែល​មាន​មនុស្ស​មកកាន់ទីនេះ​តាម​រយៈ Google Seach ជាដើម ហើ់យថ្ងៃខ្លះ​មាន​រហូត​ដល់ជាងមួយរយដង​ដែរ។ តើខ្ញុំ​គួរ​ចាប់ផ្តើម​នៅទីនេះ​ម្តងទៀត​ជាមួយនឹង​អត្ថបទ​ប្រភេទអ្វីទៅ? ..

ព្រះមហាវីរក្សត្រ ទ្រង់សោយទីវង្គត់ហើយ​កាលពីវេលាម៉ោង២ទៀបភ្លឺ ថ្ងៃ១៥ តុលានេះ នាទីក្រុងប៉េកាំង ប្រទេសចិន.. T.T

ព្រះមហាវីរក្សត្រ ទ្រង់សោយទីវង្គត់ហើយកាលពីវេលាម៉ោង២ទៀបភ្លឺ ថ្ងៃ១៥ តុលានេះ នាទីក្រុងប៉េកាំង ប្រទេសចិន.. T.T

តណ្ហាសត្វលោក

១-មើលនាយជើងមេឃសង្វែគដួងចិត្ត ថ្ងៃប្រែងងឹតពពកបាំងបិទសូន្យសុង
ខ្លាជាប់អន្ទាក់កុកហើរជាប់ជុង មច្ឆាធ្លាក់អន្លង់ អន្ទងដោយវាសនាកម្ម។

២-រីទឹករលកសន្ធប់ដំណើរ ម្រឹគសត្វលែងដើរបក្សីលែងហើរ តាមចាំ
មច្ឆាលែងហែលហាក់អស់សង្ឃឹម ធម្មជាតិធ្លាប់ញញឹមជួនជាប្រែរឹងដូចថ្ម។

៣-ខ្ញុំធ្មេចនេត្រាសមាធិចិត្ត អប់រំដួងចិត្តរៀនគិតផ្លូវល្អ
រំឮកអនុស្សាស្នេហាស្មោះស ប្រែល្អក់កករឲ្យឃ្លាតឆ្ងាយបាន។

៤-សមុទ្ទជោរនាចព្រោះមានយប់ថ្ងៃ ស្នេហ៍មានភក្តីគង់ត្រូវព្រាត់ឆ្ងាយ ព្រោះព្រាន
តណ្ហាសត្វលោកឥតឆ្ងាយគ្នាបាន បានជួបឬខកខានសុទ្ធសឹងមេរៀន ស្នេហា។

វិលវិញមកអូន

វិលវិញមកអូនណា! បើមិនមេត្តា ក៏គួរស្តាយអនុស្សាវរីយ៍យើងទាំងពីរ! ដើម្បីសុភមង្គលយើង សូមអូនផ្តល់ឱកាសឲ្យបងម្តងទៀតមកណា! ណាអូនណា!

១-យប់កាន់តែជ្រៅ បងនៅមិនគេង ធ្មេចភ្នែកស្តាប់ភ្លេង សម្លេងវាយោ
ឯនាយផ្គរលាន់ លាន់ឮដូចស្គរ ភ្លៀងចាប់បន្ទរ ស្រក់ស្រពជោកដី។

២-វស្សានសីហា ទេវតាឲ្យភ្លៀង កង្អែបហីងច្រៀង ចម្រៀងភក្តី
អរគុណមេឃា ដែលតែងប្រណី ផ្តល់ភ្លៀងស្រពដី ចងដៃស្នេហ៍គេ។

៣-រូបបងឯនេះ ទ្រូងស្ទើរតែប្រេះ រលេះរលួយ ទុក្ខព្រួយឥតល្ហែ
គម្រប់មួយឆ្នាំ ថ្ងៃផ្តើមពាក្យស្នេហ៍ ថ្ងៃនេះប្រួលប្រែ ស្នេហ៍ឥតយោគយល់។

៤-នេះជាសំនៀង ចម្រៀងភក្តី ភ្លៀងជាតន្រ្តី អង្វរនិមល
វិលវិញមកអូន ដើម្បីមង្គល បើអូននៅខ្វល់ ស្តាយអនុស្សា។

ឃ្លាតមួយរាត្រី

ដឹងទេ ថាបងនឹក! ចង់ដឹងថាបងនឹកអូនប៉ុនណា អូនសាកល្បងរាប់ដួងផ្កាយមើល៍!

១-នឹកសែននឹក សែនរលឹក គ្រប់វេលា នឹកពុំងា ដែលឃ្លាតឃ្លា មួយគ្រាទៅ
សែនស្រណោះ សែនអាឡោះ ស្រស់ពាលពៅ អាធ្រាត្រជ្រៅ ចិត្តនិត្យនៅ នឹកមមៃ។

២-សែនស្រលាញ់ គួរឲ្យក្នាញ់ ពេញឱរ៉ា សែនស្នេហា ស្រស់បុប្ផា គាប់ហរទ័យ
ស្រស់បណ្តូល កំពូលដួង ចិត្តកវី មួយរាត្រី ឲ្យខ្វល់ខ្វាយ ពេញចិន្តា។

៣-វាយោអើយ.. សូមប្រណី នាំសម្តី បង្ហាញ ចិត្តស្នេហា
ខ្សឹបប្រាប់.. ផ្ទាល់សោតា កន្និដ្ឋា ដែលប្រា ថ្នាយប់ថ្ងៃ។

៤-សែនអំពល់ ទ្រូងកង្វល់ ខ្វល់ស្នេហា សែនទុក្ខា​ សែនឯកា រ៉ានឹកស្រី
ត្រម៉ងត្រ មោចអង្គុយ គន់ដួងផ្កាយ ដែលនៅឆ្ងាយ កាយឃ្លាតឃ្លា គ្រាធុរៈ។

សែនក្រអូប

តើជាផ្កាអ្វីទៅណ៎! ក្រអូបប្រហើរ បីដូចជាស្រីក្រមុំ! ឱ នឹងមានវាសនាបានថ្នាក់ថ្នមផ្កាមួយទងនេះឬយ៉ាងណា? បើពិតជាបាន ម៉្លេះអស់ទុក្ខា? តែបើខុសប្រាថ្នា ខ្ញុំមុខជាក្ស័យមិនខាន!
———–

១-ឱក្លិនផ្កាអ្វី ក្រអូបម្ល៉េះ? ក្រអូបវិសេស ស្រង់ណាស់មិនណាយ..
ស្រង់ក្លិនគន្ធា ដែលភាយសាយ.. ស្រង់ណាស់មិនណាយ រសាយទុក្ខា។

២-បងស្រូបបងស្រឺត ក្លិនផ្កាស្រី ផ្កាឈ្មោះល្បាញល្បី សាយតាមវាតា..
បានស្រង់ជាប់ចិត្ត ក្លិនបុស្បា ចង់សុំម្ចាស់ផ្កា រក្សាឯសួន។

៣-ផ្កាសែនក្រអូប សែនពិដោរ គន់គូតាមហោ ថាបានផ្កាអូន
បើនួនប្រកែក រៀមពិតជាសូន្យ ជើងលេខហោក្បួន ស្ងួនបងរក្សា។

៤-ក្លិនអើយក្លិនផ្កា ស្រីក្រមុំ បើពិតបានមុំ ជាគូវាសនា
បងថែបងថើប ថ្នមចិន្តា ឥតឲ្យទុក្ខា ឡើយណានួនល្អង។

នៅឆ្ងាយសែនឆ្ងាយ

១-ដូចជាមេឃ ដែលខ្ពស់ឆ្ងាយភពផែន សន្ធឹងវែង បានត្រឹមតែប្រតិព័ទ្ធ
លួចគយគន់ អ្នក..មិនចេះនឿយហត់ បេះដូង កំសត់កត់ស្នាមញញឹម។

២-ពន្លឺមួយ ដែលចាំងឆ្លុះគង្គារ ចិត្តកំព្រា ប្រែជាមានក្តីសង្ឃឹម
ឱពពក ស្បៃ..នាពេលព្រឹកព្រលឹម ញញឹម ត្រអាលនឹងក្តីស្នេហា។

៣-មេឃអើយមេឃ..សុំចែករំលែកចិត្តស្នេហ៍ សុំថ្នមថែ ក្រែងបានរួចក្តីទុក្ខា
យប់ងងឹត កើតចិត្តព្រួយសោកា ប្រាថ្នា ចង់ឃើញតែសម្រស់អ្នក..។

៤-ជានិស្ស័យ ឬមិនមែនជានិស្ស័យ ខ្ពស់ឆ្ងាយដី ទោះបីជាខំប្រឹងស្ម័គ្រ
បានត្រឹម លួចសម្លឹងគយគន់ភ័ក្រ ពិតជាក់ ព្រោះអ្នកនៅឆ្ងាយសែនឆ្ងាយ។